Dyma antur ddiweddaraf y cowboi Lewsyn Lwcus yn y Gymraeg, sef stori stribed liwgar a gyhoeddwyd yn wreiddiol yn Ffrangeg. Sheriff Tre Fenter yw Lewsyn, tre'n llawn dihirod ond diolch i'n harwr, caiff y pen-bandit, Clinton Fenter, ei garcharu gan adael y dre'n wag. Yn yr un carchar mae'r brodyr Dalton, dihirod o'r radd flaenaf. Ymhen dim mae nhw'n dianc ac yn mynd am Dre Fenter. Ond does fawr o hwyl mewn tre ddiffaith! Lewsyn Lwcus sy'n cynnig ateb. Mae ganddo gynllun a allai blesio'r Daltons trwy boblogi'r dre a dod a rhagor o glod a bri i'n harwr ar yr un pryd! Sut? Darllenwch! Mae'r stori a'r lluniau'n ddigon gafaelgar ac mae'r addasiad yn ychwanegu at yr hiwmor. Pwy fasa'n meddwl bod merched y Gorllewin Gwyllt yn dawnsio i ganeuon Meinir Gwilym? Ond pwy fydd y darllenwyr? O'r cychwyn cyntaf dyw'r iaith ddim yn hawdd a thipyn o strach fydd hi i blant 9--11 oed i ddilyn y testun. Wedi dweud hynny, mae'r lluniau'n gymorth ac efallai fod digon yma i ddenu plant hyn sydd ar hyn o bryd ddim yn orhoff o godi llyfr. Wedi iddyn nhw orffen, bydd yr antur yn sicr o ddod a gwen i wyneb aelodau eraill y teulu. Er nad ydw i'n un am stori stribed, cefais flas ar hon. Rhian D. James Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatad Cyngor Llyfrau Cymru. It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council. -- Cyngor Llyfrau Cymru
Ask a Question About this Product More... |